Við viljum benda á að mengun getur haft slæm áhrif á heilsu okkar og sérstaklega þá sem eru með bronkítis-, asma- eða lungnasjúkdóma.  Það er því mikilvægt fyrir börnin ykkar að bílar séu ekki skildir eftir í lausagangi á meðan hlaupið er inn með börnin eða þau sótt í leikskólann.

Mikilvægt er að virða umsaminn dvalarsamning m.a.  vegna skipulagningar á öllu innra starfi leikskólans og starfsmannahaldi.

Mikilvægt er að hafa föt til skiptanna, nærföt, buxur, sokka og vettlinga. Hafa góð og hlý útiföt og klæðast eftir veðri. Nauðsýnlegt er að merkja allan fatnað. Muna að tæma fatahólfin á föstudögum.

Við teljum myndaalbúm geta auðveldað börnum aðlögunina og dvölina í leikskólanum. Það er ánægjulegt að hafa nokkrar myndir af sínum nánustu í myndaalbúmi.

Ef börnin verða fyrir slysi í leikskólanum er haft samband við foreldra og í samráði við þá er metið hvort leita þurfi til læknis. Mjög mikilvægt er að hægt sé að ná í foreldra símleiðis.

Ef börnin eru veik eða með smitsjúkdóm ber að hafa þau heima.  Vinsamlega tilkynnið forföll, mæti barn ekki í leikskólann.

Ef um lyfjagjafir er að ræða ber að haga þeim þannig að lyfin séu gefin heima en ekki í leikskólanum.
Astma og ofnæmislyf eru undanþeginn.

Í Seljakoti er lögð áhersla á gott samstarf við foreldra og afslappað og jákvætt viðmót í daglegum samskiptum. Foreldrar eru ávallt velkomnir í Seljakot til að fylgjast með leikskólastarfinu. Gott leikskólastarf nær mestum árangri með metnaði og ánægðu starfsfólki. Við leggjum áherslu á að starfsmannahópurinn nái vel saman og sé sammála um leiðir að markmiðum í starfi með börnunum.
Tekið er mið af þörfum og þroska hvers einstaklings í Seljakoti. Börn læra á ólíkan hátt og þroskast mishratt. Öll börn læra best í leik og starfi með öðrum börnum.

Þegar barn byrjar í aðlögun þarf það góðan tíma til að kynnast leikskólanum, starfsfólki og hinum börnunum. Á aðlögunartíma er lagður hornsteinn að öryggi og vellíðan barnsins og samstarfi heimilis og skóla. Til að það takist sem best höfum við skipulagt aðlögunarferli sem má nálgast hér.

Haldinn er foreldrafundur að vori fyrir nýja foreldra. Tilgangur fundarins er að kynna helstu áherslur í uppeldisstarfi Seljakots. Við upphaf leikskóladvalar eru forráðamenn boðaðir í viðtal, þar sem gagnkvæm upplýsingamiðlun fer fram.  Ef barn byrjar í leikskólanum á miðju skólaári eru foreldrar boðaðir í viðtal þar sem farið er yfir báða þessa þætti.

Gott að vita